Mədən Sənayesində Şəffaflığın Artırılması Koalisiyası Norvec Krallığının Azərbaycandakı səfirliyinin maliyyə dəstəyi ilə “Neft gəlirlərinin xərclənməsində şəffaflığın artırılması” layihəsini həyata keçirir. Layihə çərçivəsində nəzərdə tutulan 5 istiqamətdən biri  “Regional TV-lərdə Tok-Şouların təşkili”dir.

Bu istiqamət üzrə may ayının 24-də Gəncənin “Kəpəz TV” kanalında nəzərdə tutulan üçüncü Tok-Şounun çəkilişi  aparılıb. Tok-Şouda ekspert qismində MSŞTAK-nın əlaqələndiricisi Qubad İbadoğlu iştirak edib.

Tok-Şouda aşağıdakı mövzular ətrafında müzakirələr aparılıb:

1.  Azərbaycanın neft strategiyası, onun yaxın müddətli hədəfləri;

2.  Neft gəlirlərinin xərclənməsində şəffaflığın təmin olunmasında vətəndaş cəmiyyətinin rolu;

3.  Neft gəlirlərinin səmərəli idarə edilməsinin Azərbaycan vətəndaşının sosial durumuna təsiri;

4.  Neft müqavilələri və BTC – Biz bu haqda nə bilirik?

5.  Neft gəlirlərinin Azərbaycanın regionlarının inkişafında, sosial-iqtisadi problemlərin həllində rolu.

Qeyd edək ki, çəkiliş zamanı yuxarıda qeyd edilən mövzularla yanaşı Gəncə şəhər sakinlərini maraqlandıran digər suallarla da bağlı diskussiya aparılıb. Dünya bazarında neftin qiymətinin artması ilə əlaqədar baş verən dəyişikliklər, ölkədə qiymət artımı ilə bağlı yaşanan problemlərin fonunda neftdən gələn gəlirlərdən səmərəli istifadə yollarının axtarılması, ölkədə həyata keçirilən sosial yönümlü islahatlarda bu vəsaitlərin ən mütərəqqi tətbiqi mexanizmlərinin araşdırılması, xalqın milli sərvəti olan və bir zaman tükənəcək neftə alternativ digər mənbələrin axtarılması, neft ixrac edən bəzi ölkələrdə yaşanan acı təcrübələrin Azərbaycan uçün xarakterik olub-olmaması, əhalinin sosial rifahının yaxşılaşdırılması məqsədi ilə inkişaf etmiş ölkələrdə tətbiq edilən təcrübələrin Azərbaycanda həyata keçirilməsinin mümkünlüyü və sair.

Çəkilişdə yerli sakinlərdən 30 nəfər iştirak edib. 

Tok-şou Gəncənin “Kəpəz TV” kanalının efirində may ayının 28-də saat 19.00-da nümayiş olunacaq.  

Layihənin icrasına məsul
Mətanət Müslümqızı
26 may 2008

◄ 1 ... 46 47 48 ... 52 ► ☼ A ₪

Sənədin sonuncu korrektə tarixi: 26/7/2008 - 12:26:58