Bu gün Mədən Sənayesində Şəffaflığın Artırılması Koalisiyasının mənzil qərargahında Dünya Bankının Azərbaycan nümayəndəliyinin təşəbbüsü ilə Kamboca dövlətinin Azərbaycanda səfərdə olan nümayəndə heyəti ilə görüş keçirildi.Görüşdə  MSŞA Koalisiyasının əlaqələndiricisi Qubad İbadoğlu təqdimatla çıxış edərək Azərbaycanın neft sənayesi, hasilat və maliyyə göstəriciləri, eyni zamanda gələcəyə olan proqnozlar barədə məlumat verdi. Azərbaycanın MHŞT-yə qoşulan ilk dövlətlərdən biri olduğunu vurğulayan natiq üçtərəfli Memorandumun imzalanması barədə məlumat verdi və bundan sonra QHT-lərin İctimai Birliyi kimi Koalisiyanın fəaliyyətə başladığını söylədi. Q.İbadoğlu Koalisiyanın strukturu, həyata keçirilən layihələr barədə görüş iştirakçılarına ətraflı məlumat çatdırmaqla yanaşı müxtəlif donorların bu fəaliyyətə verdikləri dəstəyin əhəmiyyətini qeyd etdi.

Kamboca nümayəndə heyətinin rəhbəri, İqtisadiyyat və Maliyyə Nazirliyinin baş katibi Hanq Çuon Naron neftdən əldə olunan gəlirlərin monitorinqinin həyata keçirilməsinin ölkə üçün əhəmiyyətlini vurğulayaraq bu sahədə Azərbaycan QHT Koalisiyasının fəaliyyətinin təqdirəlayiq olduğunu söylədi. Qonaq Azərbaycanın bu sahədə əldə etdiyi uğurların çox maraqlı və örnək olduğunu qeyd edərək hökumətlə MSŞA Koalisiyasının əlaqələrinin necə qurulması barədə məlumat verilməsini istədi.

Koalisiyanın əlaqələndiricisi Q.İbadoğlu qurum tərəfindən verilən təkliflərin hökumət tərəfindən qəbul edilməsində müəyyən çətinliklərin olduğunu, xüsusən layihələrin icrası zamanı şirkətlərin xərcləri ilə bağlı informasiyaların əldə edilməsinin mümkün olmadığını açıqladı. Müstəqil auditorların hökumətin və şirkətlərin Hesabatlarına verdiyi Rəylərdə davamlı olaraq problemlərin təkrarlandığını nəzərə çatdıran qurum rəsmisi uçot, hesabat standartlarının, ölçü vahidlərinin müxtəlifliyi və digər səbəblərdən əldə edilən gəlirlərlə bağlı fərqlərin aşkar edildiyini qonaqların diqqətinə çatdırdı.

Görüşdə iştirak edən digər Şura üzvləri Fəqan Əliyev, İlham Hüseynli və Dünya Sakit Koalisiyanın həyata keçirdiyi fəaliyyət nəticəsində vətəndaş cəmiyyətinin inkişaf etdirilməsi istiqamətində meyllərin gücləndiyini, mədən sənayesinin digər sahələri üzrə şəffaflığın həyata keçirilməsinə diqqət yetirildiyini bildirdilər.

 Görüşün sonunda Azərbaycan və Kambocanın Qeyri Hökumət təşkilatları arasında əlaqələrin qurulmasının əhəmiyyəti vurğulandı. Qonaqlar əminliklərini bildirdilər ki, MSŞA Koalisiyasının fəaliyyəti Azərbaycanda mədən sənayesindən əldə olunan gəlirlərin şəffaflığına istiqamətlənməklə ölkənin rifahına xidmət edəcək.

Əlavə məlumat əldə etmək  istəyənlər  «Mədən Sənayesində Şəffaflığın Artırılması» Koalisiyasının mətbuat xidmətinin rəhbəri Ramil Qasımzadəyə (050 333 3448) müraciət edə bilər.

◄ 1 ... 36 37 38 ... 46 ► ☼ A ₪

Sənədin sonuncu korrektə tarixi: 16/2/2008 - 12:38:27