"Mineral Ehtiyatların Hasilatı ilə Məşgul olan Sənaye Sahələrində Şəffaflıq Təşəbbusu (MHŞT)" adı altında 2003-cü il iyunun 17-də Londonda keçirilmiş konfransdan irəli gələn öhdəliklərin yerinə yetirilməsini təmin etmək məqsədilə Azərbaycan höküməti tərəfindən yaradılmış MHŞT üzrə Komissiya Deloitte audit şirkəti tərəfindən yoxlanılmış Azərbaycan Respublikası Hökümətinin mədən hasilatı sənayesində əldə etdiyi məcmu daxilolmaları barədə növbəti (beşinci) hesabatını (2006-ci ilin yanvar-iyun ayları üzrə altı aylıq) - 2007-ci il yanvarın 31-də açıqlamışdır. Dərc edilən hesabatlara eyni zamanda hasilat (neft-qaz) sənayesində fəaliyyət göstərən şirkətlərin təqdim etdikləri fərdi hesabatların təhlili əsasında audit şirkətinin verdiyi rəy də daxildir.

Bununla da mineral ehtiyatların hasilatı ilə məşğul olan sənaye sahələrindən məcmu gəlirlər barədə artıq beşinci hesabatını dərc etdirən Azərbaycan hökuməti Təşəbbüslə bağlı üzərinə götürdüyü öhdəlikləri həyata keçirməkdə davam etdiyini bir daha təsdiq etmiş oldu. Şəffaflıq Təşəbbüsü çərçivəsində təqdim olunmuş hesabatların dərc olunması MHŞT üzrə Komissiya, Azərbaycanın hasilat (neft və qaz) sənayesində fəaliyyət göstərən yerli və xarici şirkətlər və 90 qeyri-hökumət təşkilatının (QHT) təmsil olunduğu Mədən Sənayesində Şəffaflığın Artırılması Koalisiyası arasında imzalanmış 24 noyabr 2004-cü il tarixli Qarşılıqlı Anlaşma haqqında Memoranduma əsasən həyata keçirilir.

Deloitte audit şirkətinin Rəyində deyilir: "...30 iyun 2006-ci il tarixdə bitən 6 ay ərzində qəbul olunmuş ödənişlərin/daxilolmaların cədvəli ilə bağlı Azərbaycan Respublikasının MHŞT Komissiyasının bəyannaməsi yuxarıda qeyd olunan tələblərə uyğun olaraq hazırlanmış və bütün əhəmiyyətli hallarda düzgün əks olunmuşdur".

Ölkənin hesabatı, eləcə də audit şirkətinin rəyi Dövlət Neft Fondunun, Beynəlxalq Katibliyin və QHT-lərin təmsil olunduğu Mədən Hasilatında Şəffalığın Artırılması Koalisiyasının İnternet səhifələrində yerləşdirilir.

Hökumətin Şəffaflıq Təşəbbüsü üzrə beşinci hesabatı audit (Deloitte) şirkətinin Rəyi ilə birlikdə 26 yanvar 2007-cı il tarixində keçirilmiş iclasda Memorandum tərəflərinə təqdim olunub. Tərəflərin birgə iclasında həmçinin beşinci hesabat dövrünün nəticələri müzakirə olunub.

• Azərbaycan Respublikası Hökümətinin mədən hasilatı sənayesində əldə etdiyi məcmu daxilolmaları barədə hesabatı. Hesabat dövrü: 2006-cı il 6 üzrə
• Azərbaycan Respublikasının Mineral Ehtiyatlarının Hasilatı ilə Məşğul olan Sənaye Sahələrində Şəffafliq Təşəbbüsü üzrə Komissiyası ( Müstəqil Mühasiblərin Rəyi) - 30 iyun 2006