Azərbaycan QHT-lərinin Mədən Sənayesində Şəffaflığın Artırılması Koalisiyası Şurasının Mədən Sənayesində Şəffaflıq Təşəbbüsü üzrə imzalanmış üçtərəfli Anlaşma Memorandumu ilə əlaqədar bəyanatı,
BAKI, 27 Noyabr, 2004-cü il

Biz, Azərbaycan QHT-lərinin Mədən Sənayesində Şəffaflığın Artırılması Koalisiyası Şurası olaraq Azərbaycan dövləti və Azərbaycan xalqının indiki və gələcək nəsilləri üçün çox əhəmiyyətli olan bu hadisədə bərabər hüquqlu bir tərəf kimi vətəndaş cəmiyyətini təmsil etməyimizdən qürur duyur və bunun məsuliyyətini dərk edirik.

Bununla belə aşağıdakıları bildirməyi də vacib hesab edirik. İmzalanmış Memorandum mütərəqqi və ümidverici bir hadisə olsa da, neft sənayesində şəffaflığın bərqərar olmasında hələ ki, ilk addımdır. Bu sənəddə nəzərdə tutulan hesabat formalarında məlumatların həm genişləndirilməsinə, həm də onların şirkətlər tərəfindən fərdi şəkildə açıqlanmasına böyük ehtiyac duyulur. Biz neft şirkətlərinin öz fəaliyyətlərində şəffaflığın dərəcəsini artırarkən onları narahat edən səbəblərə (müqavilələrin kommersiya sirri, digər şirkətlərlə rəqabətdə yarana biləcək çətinliklər və s.) anlayışla yanaşır, lakin eyni zamanda hesab edirik ki, hələ də onların fəaliyyətlərində şəffaflığın artırılmasına imkanlar qalır. Biz inanırıq ki, neft şirkətləri getdikcə şəffaflığın artırılmasında daha böyük nailiyyətlər qazanacaq və MSŞT-in Azərbaycanda uğur qazanmasına layiqli töhfələrini verəcəklər.

Azərbaycan QHT-lərinin Mədən Sənayesində Şəffaflığın Artırılması Koalisiyası ictimai gəlirlər üzərində şəffaflığın təmin edilməsi istiqaməntində fəaliyyət göstərmək istəyən hər bir Azərbaycan vətəndaşı ilə, hər bir təşkilatla əməkdaşlıq edəcəkdir. Biz ümid edirik ki, Azərbaycanın vətəndaş cəmiyyəti bu məsuliyyətli işdə bizi dəstəkləyəcək və ölkənin təbii sərvətlərinin istismarı və əldə edilən gəlirlər üzərində şəffaflıq tam təmin ediləcəkdir.

Azərbaycan QHT-lərinin
Mədən Sənayesində Şəffaflığın Artırılması Koalisiyası Şurası

Sənədin sonuncu korrektə tarixi: 26/7/2008 - 12:22:8