Fond rəhbəri bildirib ki, ötən rüb ərzində qurumun 2007-cı il büdcəsinin icrası çərçivəsində 27 mln. manat qaçqın və məcburi köçkün ailələrinin məskunlaşdırılması və sosial-məişət vəziyyətinin yaxşılaşdırılması üzrə tədbirlərin həyata keçirilməsinə ayrılıb, 112,5 mln. manat isə dövlət büdcəsinə transfer edilib. Həmçinin, Samur-Abşeron suvarma sisteminin yenidən qurulması layihəsinin maliyyələşdirilməsi üçün 7,3 mln. manat vəsait ödənilib. Fondun idarə edilməsi ilə bağlı xərclər isə 0,9 mln. manat olub.
Ş.Mövsümovun sözlərinə görə, DNF-nin bu ilki büdcəsinə dəyişikliklər ediləcək. Belə ki, dövlət başçısının sərəncamları ilə Bakı-Tiflis-Qars (BTQ) dəmiryolu dəhlizinin Gürcüstan hissəsinin, həmçinin azərbaycanlı gənclərin xaricdə təhsil alması ilə bağlı Tələbə Qəbulu üzrə Dövlət Komissiyasının müəyyənləşdirəcəyi xərclərin maliyyələşdirilməsi Fond vəsaitləri hesabına həyata keçiriləcək. Xatırladaq ki, ilkin mərhələdə BTQ-nin Gürcüstan hissəsinin tikintisi üçün qonşu dövlətə güzəştli şərtlərlə 200 milyon dollar kredit veriləcəyi elan edilsə də, sonradan Gürcüstanın baş naziri bu rəqəmin 300 milyon dollar olacağını bildirdi.

Maraqlıdır ki, xərclərin artması ilə eyni vaxtda DNF-yə çatacaq vəsaitlərin bir qismi azalır, bir qismi isə gecikdirilir. Belə ki, Bakı-Supsa kəməri ilə neft nəqlinin dayandırılması tranzit haqqının Fondun gəlirləri sırasından çıxmasına səbəb olub. Digər tərəfdən isə “Şahdəniz” layihəsi üzrə xarici tərəfdaşların həcmi 45 milyon dollar olan bonus ödənişləri düz bir il yubanır. Ş.Mövsümovun dediyinə görə, bonusun ödənilməsi üçün 2 əsas şərt var. Bunlardan birincisi yataqda hasilatın başlanması, ikincisi isə hasilat həcminin 12 min barel ekvivalenti səviyyəsinə çatmasıdır. Artıq birinci şərtə əməl olunub, ikinci şərtə isə ilin ikinci yarısında əməl olunacağı gözlənilir.

Xatırladaq ki, "Azərbaycan Respublikası Dövlət Neft Fondunun yaradılması haqqında" Azərbaycan Respublikası Prezidentinin 1999-cu il 29 dekabr tarixli 240 nömrəli fərmanına əsasən, Azərbaycan Respublikasının payına düşən xam neftin və qazın satışından əldə edilən gəlirlərin Azərbaycan Respublikası Dövlət Neft Fondunun vəsaitinin formalaşma mənbələrindən biri kimi müəyyən edilməsi ilə əlaqədar 2003-cü ilədək ARDNŞ-nin sazişdəki iştirak payına düşən xam neftin satışından əldə edilmiş məbləğində gəlirlər şirkət tərəfindən DNF-yə köçürülmüşdü. Prezidentin 2003-cü il 7 fevral tarixli 849 nömrəli fərmanına əsasən, ARDNŞ-nin iştirakçısı olduğu layihələrdə onun iştirak payına düşən gəlirlər DNF vəsaitinin formalaşma mənbələri sırasından çıxarılmışdı. Son sərəncamla həmin fərmana qədər ARDNŞ tərəfindən DNF-yə köçürülmüş vəsaitlər geri qaytarılır.