Xatırladaq ki, iyulun 5-də keçirilən tenderdə Qazaxıstanın «TransCentralAsia» Neftkimya Holdinqi “Petkim”in səhmləri üçün 2,05 mlrd. dollar təklif etməklə qalib elan olunmuşdu. Hərracda ikinci böyük məbləği - 2,04 mlrd. dollar – ARNDŞ-nin həmsahibkarı olduğu «SOCAR&Turcas» alyansı təklif etmişdi. Tenderin nəticələri açıqlandıqdan sonra Türkiyə mətbuatında məsələ ətrafında ciddi müzakirələr başlandı. Bu müzakirələrdə əsas diqqət yüksək qiymət “oxumaqda” «TransCentralAsia» Holdinqinə yardım etmiş şəxsin kimliyinə yönəldi. Məlum oldu ki, bu, Rusiyanın ən iri investisiya şirkətlərindən olan «Troyka Dialoq» holdinqinin sahibi (səhmlərin 65%-nin sahibi), milliyyətcə erməni olan Ruben Vardanyandır. «Ermənistan-2020» layihəsini maliyyələşdirən şəxslərdən biri olan R.Vardanyan dünyanın bütün ölkələrində yaşayan ermənilərin öz pullarını Ermənistan banklarına yatırması üçün təbliğat aparır. Ermənistanı 2020-ci ildə Cənubi Qafqazın ən güclü dövlətinə çevirmək niyyətini açıqlayan R.Vardanyan Türkiyənin «Petkim» Neftkimya Holdinqinə A.Matskeviçlə birgə sahiblik edəcəkdi.

Bu məlumatlar açıqlanandan sonra Türkiyənin  «Petrol-İş» Həmkarlar İttifaqı «Petkim»in satışına dair investisiya müsabiqəsinin nəticələrinin ləğv olunması ilə bağlı Türkiyə 13-cü İqtisad Məhkəməsində iddia qaldırıb. Daha sonra Tender Komissiyasında nəticələrə yenidən baxılıb və birinci qərar ləğv edilib. Eyni zamanda Baş Özəlləşdirmə İdarəsinə “Petkim”in səhmlərinin tenderdə ikinci məbləği təklif edən «SOCAR&Turcas» alyansına verilməsi məsləhət görülüb.

Onu da qeyd edək ki, “Petkim”lə bağlı qərarın dəyişməsinin əsl səbəbləri olaraq bir neçə məsələyə diqqət yetirilir. Bunlardan birincisi, məsələnin Azərbaycanın dövlət rəhbərliyi tərəfindən birbaşa Türkiyəli həmkarları ilə həll olunmasıdır. Daha bir səbəb kimi Qazaxıstan hakimiyyətinin məsələyə «TransCentralAsia»nın zərərinə olaraq müdaxilə etməsi göstərilir. Belə ki, bəzi məlumatlara əsasən, bu holdinqin Nursultan Nazarbayevin keçmiş kürəkəni, hazırda Qazaxıstandan kənarda mühacir həyatı yaşayan Rahat Əliyevlə maliyyə bağlılığı var və “Petkim” əməliyyatında səxavətlə təklif edilən pullar da məhz ona məxsusdur. Nəhayət, üçüncü bir səbəb kimi Türkiyə hökumət strukturlarının “Petkim”lə bağlı ciddi niyyəti olan ARDNŞ-dən daha çox vəsait almaq, hərracda qiyməti artırmaq üçün «TransCentralAsia»nın xidmətindən yararlanması göstərilir.

Qalib elan edilən ARDNŞ-ninsə “Petkim” və Türkiyənin neft-kimya məhsulları bazarı ilə bağlı planları çox nikbindir. Belə ki, ARDNŞ-in vitse-prezidenti Davud Məmmədovun APA agentliyinə bildirdiyinə görə, hazırda Türkiyədə neft-kimya məhsullarına tələbatın 75%-i idxal hesabına ödənilir: «Son bir neçə ildə Türkiyədə benzinin və neft məhsullarının qiymət artımı 2-3%, neft-kimya məhsullarının qiymət artımı isə 12-13% təşkil edib». ARDNŞ rəsmisinin sözlərinə görə, «Petkim» şirkətinin Türkiyə bazarında xüsusi çəkisi 2006-cı ildə 27% olub.

D.Məmmədov bildirib ki, ARDNŞ-nin «Petkim»ə yatıracağı investisiyalar 5-6 ilə tam ödəniləcək. Müəssisənin inkişafı üçün beynəlxalq maliyyə qurumlarından vəsaitlərin cəlb edilməsi nəzərdə tutulur: «Zavodun yaxınlığında müəssisəni xammalla təmin etmək üçün yeni bir zavodun tikintisi planlaşdırılır. Əgər işlər bizim planlar üzrə gedərsə, «Petkim»in Türkiyə bazarındakı payı 40%-i üstələyəcək».

◄ 1 2 3 4 5 6 7 8 9 10 ► ₪

Sənədin sonuncu korrektə tarixi: 26/7/2008 - 12:36:24