Azərbaycanda ilk qızıl istehsalının əvvəllər planlaşdırıldığı kimi, gələn ilin II rübündə deyil, 2008-ci ilin III rübünün ortalarınla başlanacağı gözlənilir.

«Gədəbəy» yatağının təmiz qızıl ehtiyatı təxminən 750 min unsiya həcmində qiymətləndirilir. Yataqda bundan əlavə gümüş və təxminən 15 ton mis var. Yatağın ümumi ehtiyatları isə təxminən 1,2 mln. unsiyaya bərabərdir.

İstehsalın başlamasının gecikməsi Azərbaycan Beynəlxalq Mədən Əməliyyat Şirkəti (ABMƏŞ) tərəfindən qızılın filizdən ayrılması üçün ərazidə nəzərdə tutulan zavodun quraşdırılmasındakı ləngimələrlə əlaqələndirilir.

Məlumata görə, «Gədəbəy» yatağından çıxarılan filizdən qızılın ayrılması kimyəvi üsulla həyata keçiriləcək. Bu məqsədlə ABMƏŞ tərəfindən xüsusi avadanlıqların gətirilərək quraşdırılması prosesi bir qədər gecikir.

Hesablamalara görə, 1 unsiya qızılın alınması üçün «Gədəbəy»də təxminən 15 ton zənginləşdirilmiş torpaq emal olunmalıdır. Hər 1 ton torpaqdan isə 2 qram qızıl almaq mümkündür.

Qeyd edək ki, ABMƏŞ Hasilatın Pay Bölgüsü Sazişində iştirak edir. Mineral ehtiyatların istismarına dair bağlanmış bu 30 illik müqavilədə Azərbaycan hökumətinin iştirak payı 51%, Böyük Britaniyanın «Anglo Asian Mining Plc.» şirkətinin payı isə 49% təşkil edir. Şirkətə müqavilə əsasında 6 sahə verilib. Bu sahələrdən 1-i Naxçıvan MR-da, 1-i Gəncədə, 1-i Gədəbəydə, 3-ü isə işğal altında olan ərazilərdədir (Kəlbəcərdəki «Zod», Ağdərədəki «Qızılbulaq» və Zəngilandakı «Vəcnəli» yataqları).

◄ 1 2 3 4 5 6 7 8 9 10 ► ₪

Sənədin sonuncu korrektə tarixi: 26/7/2008 - 12:36:34