Verilişin qonağı Koalisiya Şurasının üzvü, iqtisadçı-ekspert İlham Hüseynli olub.İqtisadçı-ekspert aşağıdakı suallara cavab verib:

1. Neft gəlirlərinin yoxsulluğun azaldılmasında rolu
2. Neft gəlirlərinin səhiyyə və təhsilin inkişafında rolu
3. Neft gəlirlərinin qaçqın və köçkünlərin sosial problemlərinin yaxşılaşdırılmasına təsiri
4. Ölkənin sosial siyasətində neft amili

  Ekspert neft gəlirlərinin yoxsulluğun azaldılmasında böyük rolundan, Azərbaycanda qazanılmış imkanlardan düzgün istifadə olunmamasından danışmış, neft xərcləmələrinə ictimai nəzarətin zəif olması, bu sahədə maariflənmənin də aşağı səviyyədə olması barədə məlumat verib: “Hər bir azərbaycanlı şəxsi büdcəsini hesabladığı kimi, neft gəlirlərini də hesablamalı, ictimai nəzarətin təmin olunmasında iştirak etməlidir. Dünyanın bir çox neft olan ölkələrində fondlar yaranmış və bu vəsaitin gələcək nəsillərə saxlanması üçün müvafiq qanunlar qəbul olunmuşdur.Norveçdə də belə bir fond var. Onlar bu vəsaiti çox mühafizəkar şəkildə qoruyurlar və 4% -dən artıq xərcləməyə məhdudiyyət qoyurlar. Azərbaycanda isə bu xərclər həddindən artıq çoxdur.Hətta bu barədə Dünya Bankı öz ehtiyatlılığını ifadə edib. Samur-Abşeron, Qəbələ-Oğuz-Bakı su xəttinin çəkilişi, eləcə də köçkünlərin sosial problemlərinin həllinə olan xərcləmələr çox vacibdir.Görək bu xərcləmələr nə dərəcədə düzgün aparılır?Təsəvvür edin: Bərdə və Ağcabədidə məskunlaşmış köçkünlər üçün tikilmiş evin 1m²-nin qiyməti Bakıda tikilən evlərin 1m²-dən bahadır.Bu istiqamətdə 90 mln.dollar xərclənib.Təbii ki, düzgün xərclənməyib, yeyintilər olub”.