AİS-in Küveyt Maliyyə Evi ilə birgə yaradacağı investisiya strukturunun isə payıza qədər formalaşdırılacağı gözlənilir. Mayda bununla bağlı tərəflər arasında imzalanmış memoranduma əsasən yaradılacaq struktur vasitəsilə Azərbaycan iqtisadiyyatına xarici investisiyaların cəlb olunması nəzərdə tutulur. Onun səhmlərinin 25 faizi AİS-ə, 75 faizinin isə Küveyt Maliyyə Evinə məxsus olacaq.

Şirkətin 9 mln. dollar vəsait ayırmağa qərar verdiyi Səngəçal-Qaradağ neft-qaz terminalı layihəsinin son qiymətləndirilməsi istiqamətində Amerikanın “Nexand” şirkəti ilə müzakirələr davam etdirilir. A.Axundovun dediyinə görə, müzakirələr zamanı layihənin dəyərinin artmasından da danışılıb. Belə ki, layihənin əvvəlcə nəzərdə tutulan 90 mln. dollardan daha baha başa gəlməsi gözlənilir: “Nexand bu artımın səbəblərini və bunun terminalın gücünün artması ilə əlaqəsini əsaslandırmalıdır. ”

Xatırladaq ki, bu layihədə AİS-in tərəfdaşı “Azərsun Holding” şirkətlər qrupuna daxil olan “Qafqaztransservis” şirkətidir. Və bu, həm də “Azərsun”la AİS-in partnyorluq etdiyi ikinci layihədir (Birinci layihə duz zavodunun tikintisi ilə bağlıdır –red.).

Maraqlıdır ki, şirkət rəhbərliyi Azərbaycanda insulin zavodu tikmək ideyasını indi də ingilis firması ilə reallaşdırmaq niyyətindədir. Bu barədə məlumat verən A.Axundov bildirib ki, onlar layihənin ətraflı qiymətləndirməsinin yekunlarını gözləyirlər və layihə barədə konkret məlumat avqustda açıqlanacaq: “Dünyada insulin substansiya (son məhsul üçün xammal) və son məhsul formasında istehsal olunur. Substansiya istehsalçılarının sayı çox məhduddur, çünki belə müəssisələr sayı 50 milyon nəfərdən yuxarı olan əhalinin tələbatına hesablanır. Bizim ideyamız məhz son məhsul istehsalıdır. Bu zaman substansiyaların dünyanın ən qabaqcıl istehsalçılarından alınması planlaşdırılır. Bu məsələdə heç bir qənaət olmayacaq.” İcraçı direktor onu da bildirib ki, layihənin ləngiməsi bazarın analizinin tələb olunması, tələbat və ümumilikdə dünyadakı qlobal vəziyyətlə əlaqədardır. Belə ki, zavodun məhsullarının xaricdəki potensial satış bazarı olaraq analoji müəssisələrin olmadığı Gürcüstan və Qazaxıstan nəzərdə tutulur. Qeyd edək ki, ilkin mərhələdə layihədə iştirak Danimarkanın “Novo-Nordiks” firmasına təklif olunub. Lakin bu firma onu rentabelli saymadığını bildirib. İndi isə danışıqlar adı çəkilməyən Böyük Britaniya şirkəti ilə apaılır. A.Axundovun verdiyi məlumata görə, layihənin dəyəri təxminən 15 mln. dollar civarında hesablanır.

AİS-in maliyyələşdirmək niyyətində olduğu daha bir layihənin – sement zavodunun tikintisinin icra olunacağı yer barədə qərarın avqustda veriləcəyi gözlənilir. AİS-in layihədəki tərədaşı olan Fransanın “Lafarge” şirkəti Tovuz rayonundakı izvestnyak – zəy yatağının ərazisini zavodun tikintisi üçün perspektiv ərazi kimi nəzərdən keçirir. A.Axundov bildirib ki, Azərbaycan hökuməti layihənin sürətləndirilməsində maraqlıdır. Buna görə də bu ilin sonunadək zavodun tikintisinə başlanması üçün fransızlarla danışıqlar aparır. Layihənin dəyəri 100-150 mln. avro həcmində qiymətləndirilir. AİS buradakı payının 20 faiz həcmində olmasını planlaşdırır.